Stokkseyri vann öruggan sigur á KB á útivelli í 5. deild karla í knattspyrnu í kvöld og tryggði sér þar með sæti í úrslitakeppni deildarinnar.
Stokkseyringar gerðu út um leikinn á tíu mínútna kafla í fyrri hálfleik. Steinar Aron Magnússon kom þeim í 0-1 á 18. mínútu, Davíð Örn Aitken Sævarsson bætti við öðru marki á 24. mínútu og fjórum mínútum síðar breytti Jóhann Fannar Óskarsson stöðunni í 0-3. Jón Jökull Þráinsson skoraði svo fjórða mark Stokkseyringa á 44. mínútu.
Staðan var 0-4 í hálfleik en KB náði að klóra í bakkann með einu marki undir lok seinni hálfleiks og þar við sat. Lokatölur 1-4.
Enn eru tvær umferðir eftir af deildarkeppninni en úrslitakeppnin hefst í lok ágúst og þar mæta Stokkseyringar líklegast Smára í 4-liða úrslitum.