Það verða Skallagrímur og Hamrarnir sem leika í 4. deild karla í knattspyrnu að ári. Stokkseyri mætti Skallagrím í dag í seinni leik liðanna í úrslitakeppni 5. deildarinnar og þar sigraði Skallagrímur 4-1 eftir framlengdan leik.
Fyrri leik liðanna lauk með 2-1 sigri Stokkseyringa á heimavelli en Skallagrímur jafnaði metin strax á 3. mínútu í dag með marki úr vítaspyrnu.
Staðan var 1-0 í hálfleik í Borgarnesi og Skallagrímur komst svo í 2-0 snemma í seinni hálfleik. Stokkseyringar þurftu þá nauðsynlega á marki að halda til að jafna í einvíginu en það var ekki fyrr en á fjórðu mínútu uppbótartímans að Sindri Þór Arnarson skoraði og leikurinn fór því í framlengingu.
Í framlengingunni áttu Borgnesingar meira á tanknum. Þeir skoruðu tvisvar í fyrri hálfleik framlengingarinnar og Stokkseyringar áttu engin svör á síðasta korterinu.
Stokkseyri verður því áfram í 5. deildinni á næsta ári en liðið náði besta árangri félagsins í deildinni í sumar, setti stigamet og komst í fyrsta sinn í úrslitakeppnina.