Stokkseyri og Uppsveitir eru úr leik í bikarkeppni karla í knattspyrnu þetta sumarið. Stokkseyri tapaði gegn Létti í kvöld og Uppsveitir urðu fyrir barðinu á Augnabliki um helgina.
Stokkseyri og Léttir mættust á ÍR-vellinum og þar voru Léttismenn fyrri til að skora. Þeir komust yfir á 16. mínútu en Hafþór Berg Ríkharðsson jafnaði metin fjórum mínútum síðar. Léttir svaraði með þremur mörkum á síðasta korterinu í fyrri hálfleik og staðan var 4-1 í leikhléi.
Seinni hálfleikur fór rólega af stað en á síðustu tuttugu mínútunum rigndi mörkunum. Léttir komst í 6-1 áður en Marteinn Maríus Marinósson minnkaði muninn en tveimur mínútum síðar skoraði Léttir sjöunda markið. Sindri Þór Arnarson átti lokaorðið fyrir Stokkseyringa og lokatölur urðu 7-3.
Uppsveitamenn fengu heldur betur að kenna á því þegar þeir mættu 3. deildarliði Augnabliks í Fífunni á sunnudaginn. Staðan var orðin 6-0 í hálfleik og Augnablik bætti við öðrum sex mörkum í seinni hálfleik, auk þess sem Augnablikar skoruðu eitt sjálfsmark í lokin og úrslit leiksins því 12-1.