Það var boðið upp á sunnlenskan tvíhöfða á Selfossvelli í C-deild deildarbikars karla í knattspyrnu í dag. Stokkseyri tók á móti KM og strax í kjölfarið tóku Uppsveitir á móti Kríu.
Elfar Ísak Halldórsson kom Stokkseyri yfir á 12. mínútu gegn KM og reyndist það eina mark fyrri hálfleiks. Marteinn Maríus Marinósson bætti við öðru marki fyrir Stokkseyri þegar korter var liðið af seinni hálfleik en KM minnkaði muninn strax í næstu sókn og staðan þá 2-1. Hafþór Berg Ríkharðsson skoraði tvívegis með skömmu millibili í kjölfarið og breytti stöðunni í 4-1 og Gunnar Flosi Grétarsson tryggði svo Stokkseyringum 5-1 sigur með marki sjö mínútum fyrir leikslok.
Það var meiri spenna í leik Uppsveita og Kríu þar sem Jose David Martinez kom Uppsveitum í 1-0 snemma leiks. Kría svaraði með þremur mörkum í röð en Tómas Ingi Ármann minnkaði muninn í 2-3 um miðjan seinni hálfleikinn. Uppsveitir sóttu stíft síðustu tuttugu mínúturnar en tókst ekki að finna jöfnunarmarkið.
Í riðli-3 í C-deildinni er Stokkseyri í 4. sæti með 3 stig en í riðli-1 eru Uppsveitir í 5. sæti án stiga.