Selfoss vann öruggan sigur á Stjörnunni í úrvalsdeild kvenna í handbolta í Set-höllinni Iðu í kvöld. Lokatölur urðu 29-22.
Jafnræði var með liðunum fyrstu tuttugu mínúturnar en á síðustu tíu mínútunum breytti Selfoss stöðunni úr 7-7 í 12-8 og staðan var 13-10 í hálfleik.
Stjarnan byrjaði betur í seinni hálfleik og minnkaði muninn í 17-16 en nær komust Stjörnukonur ekki. Selfoss jók forskotið aftur og á síðustu tíu mínútunum gerði Selfoss 8-4 áhlaup sem tryggði þeim öruggan sigur.
Perla Ruth Albertsdóttir var markahæst Selfyssinga með 9/3 mörk, Hulda Hrönn Bragadóttir skoraði 5/2, Eva Lind Tyrfingsdóttir 5, Harpa Valey Gylfadóttir 4, Andzelika Petroll og Sylvía Bjarnadóttir 2 og þær Katla Björg Ómarsdóttir og Eva Sól Axelsdóttir skoruðu 1 mark hvor.
Selma Þóra Jóhannsdóttir átti frábæran leik í marki Selfoss, varði 13/2 skot og var með 37% markvörslu.
Selfoss er í 5. sæti deildarinnar með 9 stig en Stjarnan er á botninum með 2 stig.