Kvennalið Selfoss vann sinn fyrsta sigur í 1. deildinni í knattspyrnu í dag þegar liðið tók á móti Tindastóli í fyrsta heimaleik sumarsins.
Stevie Reynolds reyndist hetja Selfyssinga í leiknum því hún skoraði tvívegis á fyrstu tuttugu mínútum og gerði nánast út um leikinn.
Staðan var 2-0 í hálfleik en Olga Lind Gestsdóttir bætti þriðja marki Selfoss við snemma í seinni hálfleik. Stólarnir náðu að svara fyrir sig á 61. mínútu en fleiri urðu mörkin ekki og lokatölur því 3-1.
Selfoss er í 4. sæti deildarinnar með 3 stig en Tindastóll á botninum án stiga.