Skotfélagið Skyttur í Rangárvallasýslu hefur stofnað píludeild og komið upp glæsilegri píluaðstöðu á Hvolsvelli, í gamla leikskólanum að Hvolsvegi 33. Aðstaðan þykir ein sú glæsilegasta á landinu og mun vafalítið verða lyftistöng fyrir píluíþróttina á svæðinu.
Þegar aðstaðan var opnuð síðastliðinn föstudag var jafnframt afhjúpuð þriggja metra löng píla, sú stærsta á landinu, sem mun héðan í frá prýða loftið í salnum.
Hugmyndin að stofnun deildarinnar kviknaði í lok síðasta árs hjá þeim Guðmundi Jónssyni, Andra Má Óskarssyni og Sigurði Orra Baldurssyni.
„Eftir endalausar pælingar, hugmyndavinnu og smá svita hjá okkur Andra og Orra er þetta loksins að verða að veruleika – og við gætum ekki verið spenntari,“ segir Guðmundur.
Samvinna og stuðningur fyrirtækja lykilatriði
Uppbygging aðstöðunnar tókst með dyggum stuðningi fyrirtækja á svæðinu sem styrktu kaup á nauðsynlegum búnaði. Guðmundur leggur mikla áherslu á þakklæti í þeirra garð: „Við erum ótrúlega þakklátir öllum þeim fyrirtækjum sem studdu við bakið á okkur og trúðu á verkefnið frá upphafi. Án þeirra hefði þetta einfaldlega ekki verið mögulegt og eiga þessi fyrirtæki hrós skilið fyrir frábæran stuðning.“
Sveitarfélagið hefur einnig lagt sitt af mörkum með því að leggja til húsnæði fyrir deildina.
„Við höfum varið síðustu dögum við að standsetja dæmið og smíða það sem þarf til að gera topp-aðstöðu. Þetta er líklega ein flottasta aðstaðan á landinu,“ bætir Guðmundur við.
Risapílan smíðuð í heimabyggð
En aftur að risapílunni sem skreytir salarkynnin, hún var smíðuð af hagleiksmönnum í nágrenninu eftir hugmynd frá þremenningunum.
„Þau sem þekkja mig vita kannski að ég fæ oft svolítið brenglaðar hugmyndir,“ segir Guðmundur og hlær. „Ég fékk girðingarstaura í Fóðurblöndunni og Sveinbjörn hjá SS smíðaði oddinn fyrir okkur. Næst hafði ég samband við Simma, nágranna minn, algjöran snilling á rennibekknum í Krappa. Hann renndi píluna sjálfa, og að lokum sá ég um málningu og skreytingar. Við erum rosalega sáttir með útkomuna!“
Keppni, samvera og öflugt félagsstarf
Píludeild Skyttna hefur nú þegar verið samþykkt inn í Íslenska pílusambandið. Markmið félagsins er að bjóða upp á vettvang fyrir bæði byrjendur og lengra komna, þar sem áherslan er á góða stemningu, félagsskap og skemmtilega keppni. Við opnunina á aðstöðunni mætti landsliðsmaðurinn Haraldur Birgisson og kenndi áhugasömum réttu handtökin. „Opna húsið var alveg meiri háttar og var frábær mæting,“ segir Guðmundur ánægður með viðtökurnar.
Æfingar hjá píludeildinni eru nú komnar á fullt skrið og er hægt að fylgjast með starfinu á Facebook.
