KIA Gullhringurinn er nú haldinn í 12. sinn en hann er sannarlega eitt stærsta og um leið skemmtilegasta hjólreiðamót landsins. Keppnin var fyrst haldin árið 2012 á Laugarvatni og hefur fyrir löngu skapað sér fastan stað í mótadagatali hjólreiðafólks. Nú er svo komið að á Selfossi er keppnin orðin tveggja daga viðurður.
Á laugardaginn er keppt í tveimur vegalengdum 59 km og 43 km vegalengd en í seinni vegalengdinni er boðið upp á þátttöku með og án tímatöku. Þannig geta vinahópar, saumaklúbbar og vinnustaðahópar hjólað saman á laugardagskvöldið 43 km hring sér til skemmtunar án tímapressu. Rafmagnshjól eru einnig velkomin í þá vegalengd og er hún hugsuð sem sameiginlegt skemmtimót allra sem hafa gaman af hjólreiðum en ekki bara þá sem skara fram úr í sportinu.
Ræst í miðbænum
Allar vegalengdir mótsins á laugardag eru ræstar á Brúarstræti í miðbæ Selfoss og endamarkið er fyrir framan mathöllina. Strax og þátttakendur koma í mark hefst eftirpartý á Sviðinu og tilboð á mat og drykkjum verða fyrir þátttakendur og áhorfendur á flestum veitinga- og skemmtistöðum miðbæjarins á laugardag. Allar verðlaunaafhendingarnar verða á Sviðinu klukkan 20:30 en þangað eru allir velkomnir, ekki bara þátttakendur.
Fjölskylduhringur á sunnudaginn
Á sunnudaginn bjóða KIA og BYKO upp á fjölskylduhring þar sem hjólað er frá BYKO á Selfossi, það sem Selfyssingar kalla Votmúlahringinn og endað í pulsugrilli við BYKO. Leiðin er um 12 km en ekki er um keppni að ræða heldur svokallað samhjól þar sem allir aldurs- og getuflokkar hjóla saman sér til skemmtunar. Öll hjól, þar með talin rafmagnshjól, eru velkomin og fjölskyldur hvattar til að fjölmenna. Endað verður í pulsugrilli og tónlistaratriði á BYKO planinu á Selfossi þar sem fulltrúar frá Sonax bóni verða mættir til að kenna öllum að þrífa hjólin, smyrja keðjurnar og bóna með nýrri hjólabónlínu frá þeim sem allir fá að prófa.
Vegfarendur sýni tillitssemi
Íbúum í Flóahreppi og Árborg er bent á að búast megi við umferðartöfum á þjóðvegi 1, Gaulverjabæjarvegi, Villingaholtsvegi, í gegnum Stokkseyri og Eyrarbakka og á Eyrarbakkavegi á meðan á keppni stendur á laugardagskvöldið. Meðlimir ýmissa félagasamtaka munu standa vaktina á þeim stöðum þar sem stýra þarf umferð og loka vegum. Þetta er liður í fjáröflun þessara samtaka og eru vegfarendur beðnir vingjarnlega um að þeim verði sýnd virðing og tillitssemi.