Sóley Margeirsdóttir er nýr formaður Hestamannafélagsins Geysis en Eiríkur Vilhelm Sigurðarson hefur látið af formennsku í félaginu.
Sóley var varaformaður félagsins og tekur hún við formennsku fram að næsta aðalfundi, sem fyrirhugaður er í vor. Þar verður kosið um formann félagsins að nýju.
Eiríkur tók við starfi sveitarstjóra Rangárþings ytra í sumar og í kjölfar þess óskaði hann eftir því í haust við stjórn Geysis að stíga til hliðar sem formaður.
„Það hefur verið bæði lærdómsríkt og skemmtilegt að fá að leiða félagið þessi ár. Geysir á gríðarlega sterkan hóp félagsmanna og sjálfboðaliða sem eru alltaf tilbúnir að leggja sitt af mörkum þegar á þarf að halda. Það er sá kraftur sem gerir félagið að því sem það er. Ég stíg því sáttur til hliðar úr formennskunni, en verð að sjálfsögðu ekkert langt undan þegar Geysir kallar,“ segir Eiríkur í kveðju til félagsmanna þar sem hann þakkar öllum þeim fjölmörgu sem lagt hafa hönd á plóg í starfi Geysis síðustu þrjú ár.
Auk Sóleyjar eru í stjórninni þau Caro Böse, Hulda Dóra Eysteinsdóttir, Guðmundur Björgvinsson, Edda Thorlacius Sigurðardóttir og varamaðurinn Lea Birna Lárusdóttir.