Nýliðar Selfoss byrja vel í 1. deild karla í knattspyrnu en þeir sigruðu Grindavík 2-1 í 1. umferð deildarinnar í sólinni á Selfossi í kvöld.
Liðin voru nokkra stund að þreifa fyrir sér og fátt um færi framan af. Á 25. mínútu var Aroni Vokes farið að leiðast þófið. Hann tók á sprett upp hægri kantinn og átti góða fyrirgjöf fyrir markið þar sem nýliðinn Raúl Tanque skallaði boltann glæsilega í netið.
Selfyssingar fengu nokkur hálffæri eftir þetta en þeir höfðu verðskuldaða 1-0 forystu í leikhléinu.
Seinni hálfleikurinn fór fjörlega af stað. Grindvíkingar fengu vítaspyrnu strax á 47. mínútu eftir að boltinn fór í höndina á Nacho Gil innan vítateigs Selfoss. Breki Þór Hermannsson fór á punktinn og skoraði af miklu öryggi.
Selfyssingar svekktu sig ekki mikið á þessu og fimm mínútum síðar átti Aron aftur sendingu inn á vítateiginn. Þar stýrði Ívan Breki Sigurðsson boltanum á Raúl sem skoraði af öryggi af stuttu færi.
Grindvíkingar sóttu í sig veðrið eftir þetta en Selfossliðið lá nokkuð þægilega til baka og heimamenn voru nær því að bæta við mörkum á lokakaflanum. Sanngjarn sigur þegar upp var staðið, 2-1.