Ungmennafélagið Þjótandi í Flóahreppi sigraði stigakeppni héraðsmóts HSK í frjálsum íþróttum sem haldið var í íþróttahöllinni í Kaplakrika í Hafnarfirði síðastliðinn sunnudag.
Lokastaðan í stigakeppninni var sú að Þjótandi fékk 39 stig, Umf. Selfoss varð í 2. sæti með 36 stig og Þór Þorlákshöfn í 3. sæti með 23 stig.
Þetta er í fyrsta sinn sem Þjótandi sigrar í stigakeppninni en einn af forverum félagsins, Umf. Samhygð, vann keppnina einu sinni, árið 1965.
Héraðsmót HSK í frjálsum innanhúss hefur verið haldið árlega frá árinu 1961, í 59 skipti.
Stefán Narfi Bjarnason og Brynjar Jón Brynjarsson skipuðu lið Þjótanda en Stefán sigraði og varð héraðsmeistari í 60 m hlaupi, kúluvarpi, langstökki og hástökki og Brynjar Jón varð í 2. sæti í sömu greinum.
Í kvennaflokki varð Fjóla Signý Hannesdóttir, Umf. Selfoss, fjórfaldur héraðsmeistari, en hún sigraði í 60 m hlaupi, 60 m grindahlaupi, hástökki og langstökki.
