Það var söguleg stund á Hvolsvelli í kvöld þegar Knattspyrnufélag Rangæinga lék sinn fyrsta leik á Íslandsmóti kvenna í knattspyrnu. Liðið mætir til leiks í 2. deildina í sumar og fyrsti andstæðingurinn var Fjölnir.
Það var við ramman reip að draga hjá Rangæingum í kvöld, Fjölniskonur höfðu góð tök á leiknum og KFR gekk illa að sækja. Ólafía Þórðardóttir, markvörður KFR, hafði í nægu að snúast – og stóð sig vel, enda var hún valin pulsa leiksins hjá KFR í leikslok.
Fjölniskonur komust yfir strax á 6. mínútu og þær komu boltanum aftur í netið átta mínútum fyrir hálfleik, 0-2 í leikhléi.
Stórsókn Fjölnis hélt áfram í seinni hálfleiks en KFR liðið varðist vel. Fjölnir komst í 3-0 á 49. mínútu og þar við sat alveg þangað til í lokin en gestunum tókst að skora tvö mörk á síðustu níu mínútunum og leiknum lauk með 0-5 sigri Fjölnis.
