Systurnar Sigríður og Hulda Sigurjónsdætur, frá Mið-Mörk undir Eyjafjöllum, náðu sögulegum árangri á Evrópumóti Special Olympics í bekkpressu sem fram fór í Druskininkai í Litháen þann 2. ágúst síðastliðinn.
Þær eru fyrstu íslensku keppendurnir með fötlun sem taka þátt í Evrópumóti Special Olympics í bekkpressu og náðu þær báðar glæsilegum árangri. Sigga varð Evrópumeistari í sínum flokki og vann til gullverðlauna. Hún lyfti 77,5 kg og jafnaði þar með eigið Íslandsmet. Hulda hafnaði í 2. sæti og vann til silfurverðlauna með glæsilegri frammistöðu. Hún lyfti 75 kg og jafnaði sinn besta árangur í bekkpressu.
Árangur þeirra er sögulegur fyrir íslenskar kraftlyftingar og Special Olympics á Íslandi. Hann endurspeglar mikla vinnu, óbilandi þrautseigju og þann metnað sem þær hafa sýnt í undirbúningi sínum. Með þessum glæsilega árangri unnu þær ekki aðeins til verðlauna heldur ruddu einnig brautina fyrir fleiri íþróttamenn með fötlun sem stefna á alþjóðlega keppni.
Hægt er að fylgjast með systrunum sterku hér á Facebook.