Það var frábær stemning og mikill samhugur á Selfossvelli í kvöld þar sem Selfoss og Árborg mættust í 16-liða úrslitum Gatorade bikarsins, bikarkeppni neðrideildarliða.
Hátt í eittþúsund manns mættu á leikinn í kvöld sem var styrktarleikur fyrir fjölskyldu Helgu Guðmundsdóttur en að ósk Helgu rann allur ágóði af miða-, veitinga- og happdrættismiðasölu óskertur til heimahjúkrunar Heilbrigðisstofnunar Suðurlands á Selfossi. Alls söfnuðust 6,4 milljónir króna í kvöld.
Helga, sem er móðir Arons Fannars Birgissonar, leikmanns Selfoss og fyrrum leikmanns Árborgar, lést síðastliðinn mánudag, 48 ára gömul, eftir baráttu við krabbamein. Fyrir leik var mínútu þögn til að minnast hennar og á 48. mínútu var leikurinn stöðvaður og allir viðstaddir klöppuðu í eina mínútu.
Söfnunarreikningur knattspyrnudeildarinnar fyrir heimahjúkrun HSU er ennþá opinn fyrir frjáls framlög, reikningsnúmer 0586-14-800800, kt. 690390-2569.
Leiknum lauk með 5-0 sigri Selfoss en þetta var í fyrsta skipti sem þessi nágrannafélög mætast í opinberum knattspyrnuleik. Selfoss leikur í 2. deild Íslandsmótsins og Árborg í 4. deildinni. Félögin hafa átt í áralöngu, farsælu samstarfi en fjöldi leikmanna frá Selfossi hafa spilað með báðum félögum.