KFR vann annan sigur sinn í röð í 2. deild kvenna í knattspyrnu þegar Smári frá Kópavogi kom í heimsókn á Hvolsvöll í kvöld.
Smári var á undan að skora, þær komust yfir á 13. mínútu en strax í næstu sókn jafnaði Telma Ýr Jónasdóttir metin. Hún var svo aftur á ferðinni á 22. mínútu og Rangæingar komnir í 2-1. Soffía Náttsól Andradóttir skoraði svo tvívegis undir lok fyrri hálfleiks og staðan var 4-1 í leikhléi.
Markaveislunni var ekki lokið. KFR komst í 5-1 með sjálfsmarki Smára á 62. mínútu og Smári minnkaði svo muninn í 5-2 rúmum tíu mínútum fyrir leikslok. Það var hins vegar Soffía Náttsól sem átti lokaorðið, hún innsiglaði þrennu sína á 90. mínútu og tryggði KFR 6-2 sigur.
KFR lyfti sér upp í 9. sætið með sigrinum, þær eru komnar með 7 stig en Smári er á botninum með 1 stig.