Á uppskeruhátíð Hestamannafélagsins Sleipnis heiðraði stjórn félagsins einn af fremstu afrekshestum sem komið hefur úr ræktun og eigu Sleipnisfélaga, hinn magnaða Krókus frá Dalbæ. Ræktandi og fyrrum eigendur Krókusar, þau Ari Björn Thorarensen og Ingunn Gunnarsdóttir, tóku við viðurkenningunni ásamt knapanum Sigursteini Sumarliðasyni.
Krókus hefur hlotið fleiri viðurkenningar hjá Sleipni en nokkur annar hestur í sögu félagsins. Árið 2014 varð hann hæst dæmdi kynbótahestur úr ræktun Sleipnisfélaga og hlaut ræktunarbikar Sleipnis með 8,19 fyrir byggingu, 8,90 fyrir hæfileika (þar af 10 fyrir skeið) og í aðaleinkunn 8,60. Á árunum 2014-2018 vann Krókus fjórum sinnum hinn virta Sleipnisskjöld sem er ein elsta og æðsta viðurkenning félagsins og jafnaði þar með sigurgöngu Þyts frá Kálfhóli.
Krókus keppti tvisvar á Landsmóti hestamanna í A-flokki og komst í A-úrslit í bæði skiptin og varð tvisvar sinnum Íslandsmeistari í samanlögðum fimmgangsgreinum. Síðustu ár er hann ekki aðeins þekktur sem afburða gæðingur heldur einnig sem einn hraðskreiðasti skeiðhesturinn, auk þess sem hann hefur sannað sig í slaktaumatölti. Krókur sameinar alla bestu kosti íslenska hestsins; kraft, reisn, rými og fegurð
Frá 2019 til dagsins í dag hefur Krókus verið með bestu tíma hests í eigu Sleipnisfélaga í 100 og 250 m skeiði, annað hvort í báðum greinum eða annarri. Í fyrra urðu Sigursteinn og Krókus Íslandsmeistarar í 250 m skeiði og í 2. sæti í 100 m skeiði. Til að toppa frækinn keppnisferil kepptu þeir fyrir hönd Íslands á Heimsmeistaramóti íslenska hestsins í Sviss síðastliðið sumar og unnu til silfursverðlauna bæði í 100 og 250 m skeiði á frábærum tímum. Að loknu heimsmeistaramótinu fór Krókus til nýrra eigenda í Þýskalandi.