„Slagsmál eins og þau gerast skemmtilegust“

Eyrarbakkatröllið Ómar Vignir Helgason var sáttur í leikslok í gær eftir að Selfyssingar höfðu tryggt sér oddaleik gegn Aftureldingu í umspilinu um sæti í N1 deildinni í handbolta.

„Þetta var algjör snilld og loksins var almennileg barátta í liðinu hjá okkur. Við rifum okkur upp á rassgatinu enda var ekki annað í boði. Við vorum komnir með bakið upp að vegg eins og við höfum verið í allan vetur og það sýndi sig að við erum bestir þannig,“ sagði Ómar í samtali við sunnlenska.is.

„Þetta var erfiður leikur í dag fyrir mig og liðið allt, ég er orðinn svo gamall,“ sagði Ómar sem var í stöðugri baráttu á línunni við Mosfellingana. Hann á von á hörkuleik í oddaleiknum að Varmá á þriðjudag þar sem Selfyssingar ætla sér að slá Aftureldingu út.

„Það verður sætt að klára þetta í Mosfellsbæ og það kemur ekki annað til greina en að taka þetta þar. Það verður hörkuleikur og alvöru slagsmál eins og þau gerast skemmtilegust,“ sagði Ómar að lokum.