Búið að opna fyrir skráningu á Landsmót UMFÍ 50+ sem fram ferð í Vík í Mýrdal 7.-9. júní næstkomandi.
Allir geta tekið þátt í mótinu óháð félagsaðild að ungmennafélagi. Mótið er íþrótta – og heilsuhátíð með fjölbreyttri dagskrá.
Auk keppni í hinum ýmsu íþróttagreinum verður boðið upp á ýmsa afþreyingu fyrir keppendur og gesti. Hægt verður að fara í sögugöngu um Víkurþorp, zumba, sundleikfimi, á kvöldvökur og enda kvöldið á dansleik. Því er óhætt að segja að eitthvað verður í boði fyrir alla.
Keppnisgreinar á mótinu eru utanvegahlaup um náttúruperlur Mýrdals, boccia, bridds, golf, frjálsíþróttir, hestaíþróttir, línudans, pútt, ringó, skák, pönnukökubakstur, dráttarvélaakstur, kjötsúpugerð, ljósmyndamaraþon, búfjárdómar, sund, sýningar, þríþraut og utanvegarhjólreiðar.
Allir á aldrinum 50 ára og eldri geta tekið þátt í keppnisgreinum mótsins. Þátttakendur greiða eitt mótsgjald og öðlast með því þátttökurétt í öllum keppnisgreinum. Mótsgjald er 3500 krónur óháð greinafjölda. Skráning fer fram á heimasíðu mótsins.