Skoruðum mark og það skiptir máli

Magdalena Reimus skoraði sigurmark Selfoss. sunnlenska.is/Guðmundur Karl

Selfoss vann sætan sigur á ÍBV í lokaumferð Pepsideildar kvenna í knattspyrnu í dag, 1-0 á Selfossvelli.

„Þetta var ekki fallegt, sjálfsagt einn af okkar slakari leikjum í sumar en við skoruðum mark og það er það sem skiptir máli í þessu,“ sagði Alfreð Elías Jóhannsson, þjálfari Selfoss, eftir leik.

Leikurinn var markalaus alveg fram í uppbótartíma að Selfyssingar fengu vítaspyrnu. Fram að því hafði ÍBV haft töglin og hagldirnar í leiknum án þess að ná að skora.

Magdalena Reimus fór á punktinn og skoraði af miklu öryggi.

Selfoss lauk leik í 6. sæti deildarinnar með 20 stig en liðið er nýliði í deildinni.