Afleitt gengi Ægis í 1. deild karla í knattspyrnu heldur áfram. Liðið tapaði stórt gegn Gróttu á útivelli í dag og hefur fengið á sig 22 mörk í síðustu fjórum deildarleikjum.
Leikurinn á Seltjarnarnesi í dag fór ágætlega af stað en um leið og Grótta komst yfir á 12. mínútu fóru óveðursskýin að hrannast upp. Grótta raðaði inn mörkum í kjölfarið og staðan var 4-0 í hálfleik.
Fimmta mark Gróttu kom á upphafsmínútum seinni hálfleiks en á 67. mínútu náði Daníel Karl Þrastarson að minnka muninn í 5-1 með góðu marki. Þetta var fyrsti leikur Daníels með Ægi í sumar en hann er nýkominn að láni frá Þrótti R. Fimm mínútum síðar skoraði Grótta sjötta markið og lokatölur leiksins urðu 6-1.
Ægir er í botnsæti deildarinnar með 8 stig en Grótta lyfti sér upp í 5. sætið og er með 22 stig.