Þór Þorlákshöfn tapaði naumlega þegar Tindastóll frá Sauðárkróki kom í heimsókn í Ölfusið í úrvalsdeild karla í körfubolta í kvöld. Lokatölur í sveiflukenndum leik urðu 95-98.
Liðin eru að berjast á sitthvorum enda stigatöflunnar, Þór í neðri hlutanum og Tindastóll í efri hlutanum en það var ekki að sjá í 1. leikhluta. Þórsarar fóru á kostum og leiddu 30-16 eftir tíu mínútna leik.
Tindastóll svaraði fyrir sig í 2. leikhluta, þeir minnkuðu muninn í 42-41 en Þór leiddi í hálfleik, 49-43.
Í seinni hálfleiknum var það hlutverk Þórsara að elta. Tindastóll skoraði fyrstu átta stigin og hafði frumkvæðið allan 3. leikhlutann. Mikil spenna var í leiknum í 4. leikhluta þar sem liðin köstuðu forystunni í milli sín til að byrja með en þegar nær dró leikslokum voru gestirnir í bílstjórasætinu. Þórsarar minnkuðu muninn í tvö stig þegar 25 sekúndur voru eftir en Stólarnir héldu út og sigruðu með þriggja stiga mun.
Djordje Dzeletovic og Lazar Lugic voru stigahæstir Þórsara með 25 stig en Lugic tók 8 fráköst að auki. Dachon Burk var sömuleiðis afkastamikill með 15 stig, 7 fráköst og 12 stoðsendingar.
Þór er í 10. sæti deildarinnar með 10 stig en Tindastóll er í 2. sæti með 26 stig.
Þór Þ.-Tindastóll 95-98 (30-16, 19-27, 20-31, 26-24)
Tölfræði Þórs: Djordje Dzeletovic 25, Lazar Lugic 25/8 fráköst, Dachon Burk 15/7 fráköst/12 stoðsendingar, Rafail Lanaras 14/7 fráköst/7 stoðsendingar, Haukur Davíðsson 7/4 fráköst, Emil Karel Einarsson 6/4 fráköst, Davíð Arnar Ágústsson 3.