Ægir tók á móti HK í 1. deild karla í knattspyrnu í kvöld. Sjö mörk litu dagsins ljós í fyrri hálfleik og leiknum lauk með 3-4 sigri HK.
Ægismenn komust yfir á 13. mínútu eftir klafs í vítateig HK kom Baptiste Gateau boltanum í netið. Forysta Ægis varði ekki lengi því strax í næsu sókn svöruðu HK-ingar fyrir sig og staðan orðin 1-1. HK kom sér svo í ákjósanlega stöðu með tveimur mörkum á fimm mínútna kafla um miðjan fyrri hálfleikinn þar sem Ægisvörnin var hriplek.
En fjörið var ekki búið. Þrjú mörk bættust við á þriggja mínútna kafla áður en flautað var til leikhlés. Jordan Adeyemo minnkaði muninn á 33. mínútu eftir góða sókn Ægis, strax í næstu sókn jók HK forystuna aftur í 2-4 en á 36. mínútu var Adeyemo mættur aftur í vítateig HK og skoraði gott mark. Ægismenn voru nálægt því að jafna skömmu síðar en það tókst ekki og staðan var 3-4 í hálfleik.
Seinni hálfleikurinn var öllu rólegri, bæði lið fengu fín færi en HK-menn voru líklegri til að bæta við. Þeir fengu svo vítaspyrnu á 81. mínútu en spyrna Jóhanns Arnarssonar fór framhjá. Ægismenn sóttu stíft á lokamínútunum en HK-vörnin var þétt og gestirnir fögnuðu að lokum 3-4 sigri.
Ægismenn eru í botnsæti deildarinnar með 8 stig en HK lyfti sér upp í 4. sætið og er með 22 stig.