Selfoss heimsótti KR á Meistaravelli þegar liðin mættust í 1. umferð 1. deildar kvenna í knattspyrnu í dag. Eftir fjörugan leik hafði KR 4-3 sigur.
Selfyssingar urðu fyrri til að skora en Stevie Reynolds kom þeim yfir á 18. mínútu með eina marki fyrri hálfleiks.
KR svaraði fyrir sig með tveimur mörkum á upphafsmínútum seinni hálfleiks og staðan var svo orðin 3-1 um miðjan seinni hálfleikinn.
Heimakonur virtust svo ætla að ganga endanlega frá leiknum á 76. mínútu þegar þær komust í 4-1, en Selfyssingar voru ekki hættar. Björgey Njála Andreudóttir minnkaði muninn í 4-2 á 83. mínútu og þremur mínútum síðar skoraði Reynolds aftur og staðan orðin 4-3. Selfoss náði hins vegar ekki að jafna leikinn og KR fagnaði sigri.