KFR tók á móti Aftureldingu í fjörugum leik í 2. deild kvenna í knattspyrnu á Hvolsvelli í dag.
Gestirnir reyndust sterkari og þær voru komnar í 0-2 eftir hálftímaleik. Afturelding bætti við þriðja markinu í uppbótartíma fyrri hálfleiks og staðan var 0-3 í leikhléi.
Seinni hálfleikurinn byrjaði fjörlega, Afturelding skoraði úr vítaspyrnu á 47. mínútu en fjórum mínútum síðar minnkaði Soffía Náttsól Andradóttir muninn og staðan orðin 1-4. Það breyttist hins vegar tveimur mínútum síðar þegar Afturelding skoraði sitt fimmta mark og þar við sat, allt þar til á 80. mínútu að gestirnir skoruðu sjötta markið og lokatölur urðu 1-6.
Eftir fjóra leiki í deildinni vermir KFR botninn án stiga en Afturelding er í 2. sæti með 12 stig.