Hamarsmenn eru á feiknasiglingu í 4. deild karla í knattspyrnu. Þeir unnu Elliða í kvöld á Grýluvelli en Hvergerðingar hafa nú sigrað í sjö leikjum í röð. Á sama tíma tapaði KFR á heimavelli gegn ÍH.
Ísak Leó Guðmundsson braut ísinn hjá Hamri gegn Elliða á 32. mínútu í kvöld og reyndist það eina mark fyrri hálfleiks. Hvergerðingar fengu vítaspyrnu í upphafi seinni hálfleiks og úr henni skoraði Guido Rancez af öryggi. Hann var aftur á ferðinni á 72. mínútu og sex mínútum síðar innsiglaði Rodrigo Depetris 4-0 sigur Hamars.
KFR fékk ÍH í heimsókn á Hvolsvöll og þar kom Bjarni Þorvaldsson Rangæingum yfir á 21. mínútu. Staðan var 1-0 í hálfleik en á fyrstu mínútu seinni hálfleiks jöfnuðu Hafnfirðingar metin. Leikurinn var í járnum í seinni hálfleiknum en gestunum tókst að koma boltanum í netið á 57. mínútu og fleiri urðu mörkin ekki, lokatölur 1-2.
Hamar er í góðum málum í 2. sæti deildarinnar með 21 stig og fimm stiga forskot á Árborg í 3. sætinu. KFR er í 6. sæti með 8 stig.