Sindri skrifaði undir hjá Esbjerg

Knattspyrnumaðurinn Sindri Pálmason frá Selfossi skrifaði í dag undir tveggja og hálfs árs samning við danska úrvalsdeildarliðið Esbjerg.

Sindri, sem er 17 ára gamall, fór til Esbjerg á reynslu í október og í kjölfarið sýndi danska félagið mikinn áhuga á að fá hann til liðs við sig. Selfyssingar samþykktu síðan tilboð Esbjerg í Sindra rétt fyrir jól og í framhaldinu fór hann í samningaviðræður við liðið.

„Nú taka bara við æfingar og æfingaleikir en ég byrja að æfa með liðinu á morgun, mánudag. Síðan er fyrirhuguð æfingaferð til Hollands áður en keppnistímabilið byrjar þann 1. mars,“ sagði Sindri í samtali við sunnlenska.is en hann mun æfa með U19 ára liði félagsins.

Sindri er miðjumaður og spilaði hann þrjá leiki með Selfyssingum í 1. deildinni í sumar og var lykilmaður í 2. flokki félagsins. Hann lék sína fyrstu landsleiki í haust þegar hann var valinn í U19 ára lið Íslands og lék þrjá leiki með liðinu á móti í Svíþjóð.