Knattspyrnumaðurinn Sindri Pálmason hefur gengið aftur í raðir Selfyssinga frá Esbjerg í Danmörku. Selfoss hefur einnig samið við þá Ragnar Þór Gunnarsson og Denis Sytnik.
Sindri, sem er nítján ára gamall, fór til danska liðsins frá Selfossi í byrjun árs 2014 og spilaði með unglingaliði félagsins. Sindri, sem er miðjumaður, mun styrkja lið Selfyssinga til muna en hann lék þrjá leiki með Selfyssingum í 1. deildinni sumarið 2013 áður en hann gekk í raðir Esbjerg. Hann hefur undanfarin tvö ár verið lykilmaður í U19 ára landsliði Íslands.
Í gær var einnig gengið frá félagaskiptum framherjans Ragnars Þórs Gunnarssonar frá Val í Selfoss. Ragnar lék níu leiki sem lánsmaður með Selfyssingum síðari hluta tímabilsins í fyrra og skoraði eitt mark. Hann á að baki sjö leiki og eitt mark í Pepsideild og Borgunarbikar með Val.
Þá hefur úkraínski framherjinn Denis Sytnik gengið til liðs við Selfyssinga. Denis þekkir vel til í íslenska boltanum þar sem hann spilaði með ÍBV 2010 og 2011 og Grindavík sumarið 2013 þaðan sem hann var lánaður seinni part sumars til Þróttar í Reykjavík þar sem hann spilaði undir stjórn Zoran Miljkovic, núverandi þjálfara Selfyssinga.
Frá þessu er greint á heimasíðu félagsins.