Frjálsíþróttamaðurinn Sindri Freyr Seim Sigurðsson hefur verið valinn íþróttamaður Rangárþings ytra annað árið í röð. Hann fékk viðurkenninguna afhenta á heimili sínu í dag.
Það er heilsu-, íþrótta- og tómstundanefnd Rangárþings ytra sem ákveður hver það er sem hlýtur titilinn eftir tilnefningar frá íþróttafélögum í sveitarfélaginu. Sindri hefur látið til sín taka á hlaupabrautinni undanfarin ár og er einn fremsti hlaupari landsins.
Hann varð Íslandsmeistari innanhúss í 200 m hlaupi í flokki 16-17 ára og einnig í 4×200 m boðhlaupi með sveit HSK/Selfoss. Utanhúss varð hann Íslandsmeistari í 100 m og 200 m hlaupi í flokki 16-17 ára og einnig í 4×100 m boðhlaupi með sveit HSK/Selfoss í flokki 20-22 ára. Sama sveit sló héraðsmetið í 4×100 m boðhlaupi innanhúss í flokki 20-22 ára og sjálfur tvíbætti Sindri héraðsmetið í sínum aldursflokki í 200 m hlaupi innanhúss og í 100 m hlaupi utanhúss.
Sindri hefur lítið keppt í vetur en hann ætlar að einbeita sér að mótum utanhúss á þessu ári.