Það var boðið upp á stórleik í fyrstu umferð 4. deildar karla í knattspyrnu en Árborg fékk Hamar í heimsókn á gervigrasið á Selfossi.
Það var hart barist í kvöld eins og alltaf í leikjum þessara liða. Árborg stýrði leiknum en Hamarsmenn voru fyrri til að skora. Ragnar Ingi Þorsteinsson kom þeim yfir strax á 7. mínútu með góðu skoti úr teignum.
Þar má segja að sóknaraðgerðum Hamars hafi lokið, sóknir Árborgar þyngdust og Kristinn Sölvi Sigurgeirsson jafnaði metin á 42. mínútu með skoti af stuttu færi. Aðdragandinn var áhugaverður; Kristinn Ásgeir Þorbergsson pressaði útspark Stefáns Þórs Hannessonar og boltinn endaði að lokum hjá Kristini Sölva. Hamarsmenn voru brjálaðir, reyndar ekki í eina skiptið í leiknum því nokkur hiti var í mönnum á köflum.
Staðan var 1-1 í hálfleik og látlausar sóknir Árborgar í seinni hálfleiknum skiluðu loksins árangri á 82. mínútu. Sigurmarkið kom reyndar úr óvæntri átt því Hamarsmaðurinn Przemyslaw Bielawski varð fyrir því óláni að setja boltann í eigið mark eftir hornspyrnu.
Fleiri urðu mörkin ekki. Árborgarar voru líflegri á lokakaflanum og nær því að bæta við mörkum en lokatölur urðu 2-1.