KFR og Huginn áttust við í hörkuleik í 3. deild karla í knattspyrnu á Hvolsvelli í dag. Lokatölur voru 2-3 en gestirnir skoruðu sigurmarkið í uppbótartíma.
Huginsmenn voru ferskari í upphafi og eftir tæpan hálftíma voru þeir komnir með 0-2 forystu og þannig stóðu leikar í hálfleik.
Eftir því sem leið á seinni hálfleikinn virtist allt stefna í sigur gestanna en Rangæingar voru ekki hættir og náðu þeir að jafna metin með tveimur mörkum á fjögurra mínútna kafla. Styrmir Erlendsson minnkaði muninn á 76. mínútu og Andri Freyr Björnsson jafnaði svo metin á 80. mínútu, 2-2.
Lokamínúturnar voru spennandi en þegar ein mínúta var komin framyfir venjulegan leiktíma komu gestirnir boltanum í netið beint úr aukaspyrnu. Rangæingar voru mjög ósáttir við aukaspyrnudóminn en dómaranum var ekki haggað og gestirnir tryggðu sér sigurinn úr aukaspyrnunni.