Selfoss 2 heimsótti Gróttu í 1. deild karla í handbolta á Seltjarnarnesið í dag. Gróttumenn höfðu yfirburði í leiknum og sigruðu að lokum 34-29. Þetta var fyrsta tap ungmennaliðs Selfoss eftir sex leikja sigurgöngu.
Jafnt var á flestum tölum fyrstu tuttugu mínúturnar en Gróttumenn voru sterkari síðustu tíu mínútur fyrri hálfleiks og náðu mest sjö marka forskoti. Staðan var 21-14 í hálfleik. Grótta hafði öll völd í seinni hálfleik og náði mest tíu marka forskoti en Selfoss klóraði í bakkann á lokakaflanum.
Ragnar Hilmarsson skoraði 6 mörk fyrir Selfoss, Einar Bragi Ágústsson 5, Dagur Rafn Gíslason 4, Guðjón Óli Ósvaldsson og Kári Einarsson 3, Arnar Gauti Þorkelsson, Sölvi Berg Auðunsson og Þormar Sigurðsson 2 og Dagbjartur Máni Björnsson 1. Garðar Freyr Bergsson varði 10 skot í marki Selfoss og Egill Eyvindur Þorsteinsson 6.
Selfoss 2 er í 3. sæti deildarinnar með 16 stig en Grótta er í 2. sæti með 18 stig.

