Hamar/Þór vann frábæran sigur á KR í úrvalsdeild kvenna í körfubolta í kvöld. Lokatölur urðu 107-95 en leikurinn var sá fyrsti undir stjórn Hallgríms Brynjólfssonar.
KR leiddi allan 1. leikhlutann en staðan að honum loknum var 19-24. Hamar/Þór jafnaði 37-37 um miðjan 2. leikhluta og fylgdi því áhlaupi vel eftir en staðan var 49-44 í hálfleik.
Þær sunnlensku blómstruðu í upphafi seinni hálfleiks og náðu að auka forskot sitt í átján stig, 64-46. Eftir það féllu öll vötn niður Ölvesið og KR átti enginn svör við frábærum leik heimakvenna.
Jada Guinn var yfirburðamanneskja á vellinum, hún skoraði 38 stig og sendi 9 stoðsendingar, Mariana Duran átti sömuleiðis stórleik með 26 stig og 9 fráköst og Ana Clara Paz skoraði 24 stig. Jóhanna Ýr Ágústsdóttir og Jovana Markovic skoruðu 7 stig og Markovic tók 9 fráköst að auki. Matilda Sóldís Svan Hjördísardóttir skoraði 4 stig og Bergdís Anna Magnúsdóttir 1.
Hamar/Þór lyfti sér úr neðsta sæti deildarinnar með þessum þriðja sigri sínum í vetur og lauk deildarkeppninni í 9. sæti með 6 stig. Nú tekur tvískipt deild þar sem Hamar/Þór er í B-riðli ásamt Keflavík, Stjörnunni, Tindastól og Ármanni.