Á ársþingi Ungmennasambands Vestur-Skaftafellssýslu í síðustu viku voru þeir Sigmar Helgason á Kirkjubæjarklaustri og Sveinn Þorsteinsson í Vík sæmdir gullmerki ÍSÍ fyrir þeirra góðu störf í þágu íþróttanna.
Sigmar hefur verið tengdur íþróttum frá barnsaldri. Hann byrjaði ungur í félagsmálum og tók til starfa í stjórn Ungmennafélagsins Ármanns þegar hann var 16 ára og sinnt þar mörgum hlutverkum síðan. Hann hefur því í nærri 50 ár unnið fyrir félögin á svæðinu. Sigmar hefur tvisvar verið formaður USVS og síðustu ár hefur hann verið í stjórn USVS. Þá hefur hann verið öflugur sjálfboðaliði hjá Hestamannafélaginu Kópi, komið að mótahaldi og fjáröflun félagsins.
Sveinn hefur starfað fyrir Ungmennafélagið Kötlu á einn eða annan hátt frá upphafi félagsins, árið 2008. Hann hefur starfað lengi fyrir USVS og m.a. verið formaður sambandsins um árabil. Sveinn hefur alltaf verið áhugasamur um starfsemi sambandsins og kom að stofnun Umf. Kötlu þegar tvö ungmennafélög í Mýrdalshreppi stofnuðu nýtt félag árið 2008. Án hans óeigingjarna starfs væri félagið ekki á þeim góða stað sem það er í dag.