Stokkseyringar hófu keppni í 5. deild karla í knattspyrnu í dag þegar þeir fengu sterkt lið RB í heimsókn á Stokkseyrarvöll. Það gekk á ýmsu á Eyrinni í dag en leiknum lauk með 3-3 jafntefli.
Marteinn Maríus Marinósson kom Stokkseyringum yfir á 20. mínútu en RB-menn jöfnuðu metin aðeins þremur mínútum síðar. Fyrri hálfleikurinn var fjörugur og á 43. mínútu komust gestirnir yfir en Hafþór Berg Ríkarðsson jafnaði fyrir Stokkseyringa tveimur mínútum síðar, rétt áður en flautað var til hálfleiks.
Stokkseyringar mættu ferskir inn í seinni hálfleikinn og Jón Jökull Þráinsson kom þeim í 3-2 strax eftir rúmar tvær mínútur. Enn og aftur komu tvö mörk í beit því RB jafnaði 3-3 þremur mínútum síðar.
Mörkin urðu ekki fleiri en það gekk á ýmsu í seinni hálfleiknum og Stokkseyringar luku leik með 9 leikmenn á vellinum. Einar Ísak Friðbertsson fékk að líta rauða spjaldið á 69. mínútu þegar hann braut af sér sem aftasti varnarmaður og í uppbótartímanum fékk varamaðurinn Erlingur Örn Birgisson sitt annað gula spjald, níu mínútum eftir að hann kom inná.
RB-menn lágu talsvert á Stokkseyringum síðustu tuttugu mínúturnar en heimamenn héldu sjó og fögnuðu góðu stigi í lokin.