Selfoss vann gríðarlega mikilvægan sigur á Magna í 2. deild karla í knattspyrnu í dag. Liðin mættust á Selfossvelli og þar urðu lokatölur 6-0.
Guðmundur Stefánsson braut ísinn á 23. mínútu og á eftir fylgdu mörk frá Brynjari Bergssyni og Frosta Brynjólfssyni, 3-0 í hálfleik.
Frosti var aftur á ferðinni á 56. mínútu og staðan var 4-0 allt þar til í uppbótartímanum. Daði Kolviður Einarsson og Eysteinn Ernir Sverrisson bættu þá við mörkum en Magnamenn höfðu þá misst mann af velli með rautt spjald og eftirleikurinn auðveldur hjá Selfyssingum.
Selfyssingar þurftu svo sannarlega á stigunum að halda í harðri baráttu við Kára um 2. sætið. Selfoss er í 2. sæti með 39 stig en Kári í 3. sæti með 36 stig þegar tvær umferðir eru eftir af deildinni. Káramenn hafa talsvert hagstæðara markahlutfall svo Selfyssingum veitti ekki af að raða inn mörkum í dag og minnka þann mun.