Sex keppendur frá Selfossi til Bakú

Íslenski hópurinn sem fer á Ólympíuhátíð Evrópuæskunnar. Ljósmynd/Aðsend

Ísland sendir 34 keppendur á Ólympíuhátíð Evrópuæskunnar sem fram fer í Bakú í Azerbaijan dagana 21.-27. júlí og Sunnlendingar eiga nokkra fulltrúa í hópnum.

Eins og sunnlenska.is hefur greint frá keppir Dagur Fannar Einarsson í langstökki og Eva María Baldursdóttir í hástökki.

Í U17 ára landsliði Íslands í handbolta á Selfoss þrjá fulltrúa, þá Ísak Gústafsson, Reyni Frey Sveinsson og Tryggva Þórisson. Átta bestu þjóðir heims í árgangnum taka þátt í mótinu.

Þá er einn Selfyssingur í fimleikalandsliðinu en það er Hildur Maja Guðmundsdóttir sem mun keppa í áhaldafimleikum.

Örvar Ólafsson frá Stóru-Hildisey, verkefnastjóri hjá ÍSÍ er aðalfararstjóri ferðarinnar.