Átta HSK met sett á MÍ í frjálsum

Boðhlaupssveit HSK/Selfoss setti þrjú HSK-met. (F.v.) Dagur Fannar, Unnsteinn, Elías Örn og Sindri Freyr. Ljósmynd/Sigurður Kristinn Guðbjörnsson

Meistaramót Íslands í frjálsíþróttum var haldið í Kaplakrika í Hafnarfirði dagana 23. og 24. febrúar sl. Sex keppendur af sambandssvæði HSK tóku þátt í mótinu og settu þeir samtals átta HSK met og unnu til tveggja verðlauna.

Sindri Freyr Seim Sigurðsson, Umf. Heklu, bætti HSK metið í þremur flokkum í 200 metra hlaupi innanhúss. Sindri hljóp á 23,38 sek og bætti met Dags Fannars Einarssonar í 16-17 ára flokki og 18 – 19 ára flokki um 0,18 sek. Þá bætti hann HSK met Haraldar Einarssonar í 20 – 22 ára flokki um 0,06 sek. Þess má geta að Haraldur á HSK metið í karlaflokki sem er 22,90 sek.

Dagur Fannar Einarsson bætti héraðsmetið í 60 m grindahlaupi á 106,7 sm grindur í flokkum 16-17 ára og 18-19 ára. Dagur Fannar hljóp á 9,10 sek en gamla metið var 9,33 sek. Það átti Jakob Alf Arnarson í 16-17 ára flokknum og Jakob og Bjarni Már Ólafsson saman í 18-19 ára flokknum. 

Sveit HSK/Selfoss setti svo þrjú HSK met í 4 x 400 metra hlaupi þegar hún hljóp vegalendina á 3;50,92 mín. Í sveitinni voru Sindri Freyr og Dagur Fannar ásamt Elíasi Erni Jónssyni og Unnsteini Reynissyni. Þessi árangur er met í 16-17, 18-19 og 20-22 ára flokki.

Bronsverðlaun Dags Fannars í grindinni voru einu verðlaun HSK karla á mótinu en í kvennaflokki varð Fjóla Signý Hannesdóttir önnur í 60 m grindahlaupi.