Sex HSK-met féllu á Maímóti Selfoss í frjálsum íþróttum, sem haldið var á Selfossvelli í síðustu viku.
Hanna Dóra Höskuldsdóttir, Umf. Selfoss, kastaði kringlunni 41,09 m og bætti héraðsmetið í flokki 20-22 ára kvenna um tæpan einn og hálfan metra. Thelma Björk Einarsdóttir, Umf. Selfoss, átti fyrra metið í flokknum, 39,73 m. Hanna Dóra hefur bætt sig hratt undanfarin misseri en hún setti sitt fyrsta HSK met í einstaklingsgrein í október síðastliðnum í kringlukasti innanhúss og kastaði þá 35,76 m.
Kristján Kári Ólafsson, Umf. Selfoss, tvíbætti héraðsmetið í sleggjukasti 18-19 ára pilta. Fyrra metið átti Dagur Fannar Magnússon, Umf. Selfoss, 46,55 m en Kristján Kári gerði sér lítið fyrir og kastaði 47,68 m og bætti svo tæpum 30 sm við með kasti upp á 47,94 m.
Bryndís Embla Einarsdóttir bætti sinn besta árangur í spjótkasti þegar hún kastaði 46,89 metra. Hún bætti þar eigið héraðsmet í flokkum 16-17 ára, 18-19 ára og 20-22 ára kvenna en þess má geta að kastið er aðeins 18 sm frá Íslandsmeti Ásdísar Hjálmsdóttur í flokki 16-17 ára.