Í dag var undirritaður áframhaldandi styrktarsamningur á milli röraverksmiðjunnar Set og handknattleiksdeildar Umf. Selfoss, en Set hefur styrkt deildina í áratugi.
Þess má geta til gamans að einn af lykilmönnum karlaliðs Selfoss, Einar Sverrisson, er starfsmaður á söludeild Set. Einar hefur einmitt verið valinn í sérstakan afrekshóp HSÍ en markmiðið með hópnum er að undirbúa fleiri leikmenn fyrir A landsliðið í framtíðinni.
Magnús Matthíasson, formaður handknattleiksdeildarinnar, sagði við undirritunina í dag að styrktur sem þessi væri deildinni gríðarlega mikilvægur og undirstaða þess að deildin gæti haldið áfram það góða starfi sem hún hefur unnið undanfarin ár.
Magnús og Þorsteinn Rúnar Ásgeirsson, gjaldkeri, undirrituðu samninginn fyrir hönd Handknattleiksdeildarinnar, en Brynjar Bergsteinsson, framleiðslu- og vörustjóri Set, undirritaði samninginn fyrir hönd Set.