Fimleikadeild Selfoss á tvö lið, samtals 20 iðkendur, sem keppa fyrir Íslands hönd á Norðurlandamóti unglinga í hópfimleikum í Sola í Noregi á laugardaginn.
Þar er um að ræða blandað lið unglinga og stúlknalið. Blandaða liðið keppir klukkan 8:30 að íslenskum tíma og stúlknakeppnin hefst klukkan 11:30 að íslenskum tíma en áætlað er að Selfoss stelpurnar hefji keppni klukkan 12:15.
Liðin unnu sér keppnisrétt með því að vinna úrtökumót sem haldið var af Fimleikasambandi Íslands í haust. Liðin eru búin að undirbúa sig vel síðustu mánuði og eru spennt að stíga á stóra sviðið en margir keppendanna eru að keppa á stórmóti í fyrsta skipti.
Þjálfarar liðanna eru Tanja Birgisdóttir, Aníta Þorgerður Tryggvadóttir, Heiðrún Ósk Sævarsdóttir, Sally Ann Vokes, Birta Sif Sævarsdóttir og Helga Sonja Matthíasdóttir.
Hægt er að fylgjast með mótinu í beinu streymi sem kaupa má aðgang að hér og öll úrslit frá mótinu munu birtast hér.
