Keppendur frá júdódeild Ungmennafélags Selfoss náðu stórgóðum árangri á afmælismóti Júdósambands Íslands sem haldið var í júdósal Ármanns í Laugardalnum um miðjan febrúar.
Keppendur á aldrinum 11 til 21 árs tóku þátt í mótinu en Selfoss sendi fimmtán keppendur til leiks og stóðu þeir sig mjög vel.
Í flokki stúlkna yngri en 13 ára unnu Írena Rán Arnardóttir og Helga Birgisdóttir gullverðlaun í sínum þyngdarflokkum og Erna Elmarsdóttir og Steinunn Atladóttir unnu silfurverðlaun.
Í flokki drengja yngri en 13 ára unnu Franz Smárason og Rúnar Óskarsson silfurverðlaun í sínum þyngdarflokkum og þeir Stefán Úlfarsson og Lárus Gíslason brons.
Í flokki keppenda yngri en 15 ára unnu þau Svava Stefánsdóttir og Jónas Gíslason silfurverðlaun í sínum þyngdarflokkum.
