Judodeild Selfoss sendi stóran hóp af keppendum til leiks á Góumót Júdófélags Reykjavíkur sem haldið var þann 24. febrúar síðastliðinn, en það er æfingamót fyrir yngstu iðkendurna frá 7-10 ára.
Selfoss átti flesta keppendur á mótinu eins og oft áður og unnu þeir flest gullverðlaunin á mótinu. Mótið er opið öllum félögum og fá allir keppendur þátttökuverðlaun. Keppendur voru 52 frá fimm félögum; Judofélag Reykjavíkur, judodeild Ármanns, Judofélagi Reykjanesbæjar, judodeild Grindavíkur og judodeild Selfoss.
Flestir þátttakendanna voru að taka þátt í sínu fyrsta móti og stóðu þau sig alveg frábærlega og höfðu þjálfarar þeirra í nógu að snúast við að undirbúa þau og leiðbeina. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á, en stundum þarf að sameina þyngdarflokka svo allir fái mótherja.
Mótið var vel sótt bæði af keppendum sem og foreldrum eða öðrum skyldmennum sem að fylgdust með keppninni og var þetta frábær skemmtun og ótrúlega flott judo sem þessir ungu iðkendur sýndu.