Selfoss vann sinn fyrsta sigur í 1. deild karla í körfubolta í vetur þegar Skallagrímur kom í heimsókn í Vallaskóla í kvöld. Lokatölur urðu 86-69.
Leikurinn var í járnum í 1. leikhluta en í 2. leikhluta stungu Selfyssingar af og staðan var 54-38 í hálfleik.
Gestirnir áttu ágætan sprett í upphafi seinni hálfleiks og minnkuðu þá muninn í 61-52. Munurinn varð minnstur sex stig í upphafi 4. leikhluta en þá tóku Selfyssingar aftur við sér og juku forskotið hratt.
Avery Sullivan var framlagshæstur hjá Selfyssingum með 20 stig, 13 fráköst og 8 stoðsendingar og Halldór Benjamín Halldórsson og Tristan Máni Morthens voru sömuleiðis atkvæðamiklir með 19 stig.
Selfoss er í 9. sæti deildarinnar með 2 stig en Skallagrímur er á botninum án stiga.
Selfoss-Skallagrímur 86-69 (20-18, 34-20, 11-18, 21-13)
Tölfræði Selfoss: Avery Sullivan 20/13 fráköst/8 stoðsendingar, Tristan Máni Morthens 19, Halldór Benjamín Halldórsson 19/4 fráköst, Fjölnir Morthens 11/6 stoðsendingar, Aristote Bissokot 6/8 fráköst, Pétur Hartmann Jóhannsson 5, Sigurður Darri Magnússon 3, Gísli Steinn Hjaltason 3.