Selfoss náði í sitt fyrsta stig í úrvalsdeild karla í handbolta í vetur en var grátlega nálægt sigri, þegar Stjarnan kom í heimsókn í Set-höllina í kvöld. Lokatölur urðu 34-34.
Stjarnan hafði forystuna allan fyrri hálfleikinn, gestirnir komust í 2-7 en Selfoss náði að minnka muninn í eitt mark, 15-16, þegar stutt var til leikhlés. Staðan í hálfleik var 17-19 en Selfoss byrjaði seinni hálfleikinn af miklum krafti og komst yfir, 22-21.
Leikurinn var í járnum eftir það en Selfoss hafði undirtökin og var með þriggja marka forystu um miðjan seinni hálfleikinn, 30-27. Sóknarleikur liðsins riðlaðist hins vegar á síðasta korterinu, Stjarnan jafnaði 32-32 þegar tæpar sjö mínútur voru eftir og eftir það var jafnt á öllum tölum. Selfoss átti síðustu sókn leiksins og fékk vítakast á lokasekúndunni en markvörður Stjörnunnar varði frá Tryggva Sigurberg Traustasyni og tryggði sínum mönnum eitt stig.
Hákon Garri Gestsson var markahæstur Selfyssinga með 10/1 mörk, Jónas Karl Gunnlaugsson skoraði 7, Guðjón Baldur Ómarsson 6, Valdimar Örn Ingvarsson 4, Tryggvi Sigurberg Traustason og Ragnar Hilmarsson 3 og Haukur Páll Hallgrímsson 1.
Alexander Hrafnkelsson varði 11 skot í marki Selfoss og var með 24% markvörslu.
Þetta voru fyrstu stig beggja liða í deildinni í vetur. Selfoss er í 9. sætinu og Stjarnan í því 10.