Staðan í einvígi Selfoss og Sindra í undanúrslitum 1. deildar karla i körfubolta er 1-1, eftir að Selfyssingar unnu magnaðan sigur á heimavelli í kvöld, 85-81.
Selfoss byrjaði af miklum krafti, spilaði frábæra vörn í 2. leikhluta og staðan í hálfleik var 47-36.
Sindri minnkaði muninn í þrjú stig með góðu áhlaupi í upphafi seinni hálfleiks en þá settu Selfyssingar aftur í gírinn og staðan var 68-58 þegar 4. leikhluti hófst. Í honum héngu Sindramenn í hálsmálinu á Selfyssingum allan tímann en Selfoss hélt forystunni allt til loka og sigur þeirra var sanngjarn þegar upp var staðið.
Steven Lyles var stigahæstur Selfyssinga með 33 stig.
Leikur þrjú verður á Hornafirði næstkomandi föstudag og leikur fjögur á Selfossi þriðjudaginn 28. apríl.
Selfoss-Sindri 85-81 (28-23, 19-13, 21-22, 17-23)
Tölfræði Selfoss: Steven Lyles 33/5 fráköst, Ari Hrannar Bjarmason 12, Tristan Máni Morthens 11/4 fráköst, Collin Pryor 9/12 fráköst, Óðinn Freyr Árnason 8, Kristijan Vladovic 6/5 stoðsendingar, Fjölnir Morthens 5, Gísli Steinn Hjaltason 1.