Iðkendur frjálsíþróttadeildar Selfoss eru margir á ferð og flugi í Evrópu næstu daga vegna landsliðsverkefna. Framundan eru mót í Noregi, Norður-Makedóníu og Svíþjóð.
Eva María Baldursdóttir, Umf. Selfoss, náði lágmarki í hástökki á Evrópumeistaramót U23 sem hefst í Bergen í Noregi í dag. Eva María keppir í hástökki í dag en fjórar aðrar íslenskar stúlkur náðu lágmarki á mótið.
Ólympíuhátíð Evrópuæskunnar fer fram í Skopje í Norður Makedoníu dagana 20.-26. júlí og þar á frjálsíþróttadeild Selfoss tvo keppendur af þeim fjórum sem Ísland sendir í frjálsíþróttakeppnina. Bryndís Embla Einarsdóttir keppir í spjótkasti fimmtudaginn 24. júlí og Hjálmar Vilhelm Rúnarsson keppir í tugþraut en þrautin fer fram 21.-22. júlí. Rúnar Hjálmarsson, yfirþjálfari frjálsíþróttadeildar Selfoss, er auk þess þjálfari íslenska hópsins.
Að síðustu fer Norðurlandameistaramót U20 fram í Uppsala í Svíþjóð dagana 26.-27. júlí. Einn keppandi keppir í hverri grein frá Íslandi og voru fjórir iðkendur frjálsíþróttadeildar Selfoss valdir til keppninnar. Daníel Breki Elvarsson keppir í spjótkasti, Hanna Dóra Höskuldsdóttir Umf Selfoss keppir í kringlukasti, Þorvaldur Gauti
Hafsteinsson keppir í 800m hlaupi og Ívar Ylur Birkisson, Íþf. Dímon, keppir í 110 m grindahlaupi.