Selfoss tók á móti Sindra í fjórða leik liðanna í undanúrslitum 1. deildar karla í körfubolta í kvöld. Sindramenn skoruðu sigurkörfuna á lokasekúndunum og tryggðu sér eins stigs sigur og 3-1 sigur í einvíginu.
Selfyssingar voru sterkari í fyrri hálfleiknum og staðan var 55-44 í hálfleik. Munurinn hélst svipaður í 3. leikhluta en í 4. leikhluta fór róðurinn að þyngjast hjá Selfyssingum.
Sindramenn jöfnuðu 83-83 þegar tæpar sex mínútur voru eftir en Selfoss jók forskotið aftur og hafði átta stiga forystu þegar ein og hálf mínúta var eftir. Þá fór allt í skrúfuna, Sindramenn röðuðu niður þristum og skoruðu síðustu níu stig leiksins. Lokatölur 95-96 og Sindri mætir Breiðabliki í úrslitaeinvígi um sæti í úrvalsdeildinni.
Steven Lyles var framlagshæstur Selfyssinga með 34 stig og 7 fráköst og Collin Pryor og Kristijan Vladovic skiluðu sömuleiðis drjúgu framlagi.
Selfoss-Sindri 95-96 (22-19, 33-25, 23-23, 17-29)
Tölfræði Selfoss: Steven Lyles 34/7 fráköst, Kristijan Vladovic 19/9 stoðsendingar, Collin Pryor 16/10 fráköst, Óðinn Freyr Árnason 10, Fjölnir Morthens 7, Ari Hrannar Bjarmason 5, Halldór Halldórsson 4.