Selfoss 2 gerði sér lítið fyrir og skellti Herði á útivelli á Ísafirði í 1. deild karla í handbolta í kvöld. Lokatölur á Torfnesi urðu 27-33.
Selfoss 2 náði strax frumkvæðinu í leiknum og piltarnir komust mest í sex marka forystu í fyrri hálfleiknum. Staðan í leikhléi var 10-15.
Þeir vínrauðu höfðu svo góð tök á leiknum stærstan hluta seinni hálfleiks en örlítil spenna hljóp í leikinn þegar rúmar fjórar mínútur voru eftir og Hörður hafði minnkað muninn í þrjú mörk. Selfyssingar höfðu ekki stórar áhyggjur af því heldur slógu í klárinn og juku forskotið aftur í sex mörk.
Aron Leo Guðmundsson fór mikinn í liði Selfoss 2 og skoraði 13 mörk, Ragnar Hilmarsson skoraði 6, Bjarni Valur Bjarnason 5, Dagur Rafn Gíslason 3, Skarphéðinn Steinn Sveinsson og Bartosz Galeski 2 og þeir Dagbjartur Máni Björnsson og Hilmar Bjarni Ásgeirsson skoruðu 1 mark hvor.
Ísak Kristinn Jónsson varði 7 skot í marki Selfoss 2 og Garðar Freyr Bergsson 4.
Selfoss 2 er áfram í 7. sæti deildarinnar með 18 stig en Hörður er í 5. sæti með 19 stig.