Stór hópur frá júdódeild Umf. Selfoss mætti á Góumót Júdófélags Reykjavíkur sem haldið var laugardaginn 25. febrúar síðastliðinn. Mótið er æfingamót fyrir yngstu iðkendurna, 7-10 ára, þar sem allir fá þátttökuverðlaun.
Keppendur voru fjörtíu og fimm frá fimm félögum og voru það JR, júdódeild Umf. Grindavíkur, Júdódeild Ármanns, Júdófélag Reykjanesbæjar og júdódeild Umf. Selfoss sem öttu þar kappi. Ánægjulegt er að segja frá því að Selfyssingar áttu flesta keppendur á mótinu.
Margir þáttakendanna voru að taka þátt á sínu fyrsta móti, meðan aðrir hafa keppt mörgum sinnum. Keppendur stóðu sig frábærlega og margar góðar glímur litu dagsins ljós. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á. Mótið var frábær skemmtun og ótrúlega flott júdó sem þessir ungu iðkendur sýndu, segir í tilkynningu frá Selfyssingum.