Það var vel tekið á því í jöfnum og spennandi Suðurlandsslag í 1. deild karla í körfubolta í kvöld. Hamar tók á móti Selfossi í Hveragerði og þar höfðu Selfyssingar betur, 81-87.
Fyrsti leikhluti var jafn en Hamar var skrefinu á undan og staðan var 25-22 að honum loknum. Í 2. leikhluta skiptust liðin á um að hafa forystuna en Selfyssingar leiddu í leikhléi, 48-49.
Þriðji leikhluti var í járnum en í upphafi þess fjórða gerðu Selfyssingar nánast út um leikinn þegar þeir skoruðu þrettán stig í röð og þegar sex mínútur voru eftir af leiknum var staðan orðin 64-79. Hamarsmenn svöruðu þá hressilega fyrir sig og náðu að minnka muninn í tvö stig þegar rúm mínúta var eftir. Selfyssingar héldu vel á spilunum á lokamínútunni, skoruðu síðustu fjögur stig leiksins og tryggðu sér sex stiga sigur.
Collin Pryor var besti maður vallarins í kvöld, hann skoraði 19 stig og tók 16 fráköst fyrir Selfyssinga en hjá Hamri var Franck Kamgain stigahæstur með 21 stig og Isaac Johnson var framlagshæstur með 20 stig, 10 fráköst og 6 stoðsendingar.
Selfyssingar eru í 8. sæti deildarinnar með 16 stig en Hamar í 11. sæti með 6 stig.
Hamar-Selfoss 81-87 (25-22, 23-27, 14-17, 19-21)
Tölfræði Hamars: Franck Kamgain 21/6 fráköst, Isaac Johnson 20/10 fráköst/6 stoðsendingar, Ryan Peters 14/9 fráköst/4 varin skot, Björn Ásgeir Ásgeirsson 11, Lúkas Aron Stefánsson 11/6 fráköst, Birkir Máni Daðason 4.
Tölfræði Selfoss: Collin Pryor 19/16 fráköst, Kristijan Vladovic 16/8 stoðsendingar, Ari Hrannar Bjarmason 15/9 fráköst, Steven Lyles 12/7 fráköst, Halldór Halldórsson 8, Tristan Máni Morthens 7, Birkir Máni Sigurðarson 5, Gísli Steinn Hjaltason 3, Óðinn Freyr Árnason 2.